ಕಾಮನ ಬಿಲ್ಲೇಕೆ ಅರ್ಧ ?

ಕಾಮನ ಬಿಲ್ಲೇಕೆ ಅರ್ಧ ?

ಪೂರ್ತಿ ನೋಡುವ ಆಸೆ ನಿನಗಿಲ್ಲವೆ ?

ನಗುಮೊಗದಿ, ಕೈಕುಲುಕಿ

ಹೊಸ ಬಟ್ಟೆ ಉಟ್ಟು, ಸಿಹಿ ಉಗ್ಗಿ ಉಂಡು,

ಎಲ್ಲರೊಟ್ಟಿಗೆ ಕೂಡಿ ನಲಿದಾಡಿದ

ಆ ಘಳಿಗೆಗಳಷ್ಟೇ..., ನಿನಗಿಷ್ಟ!

ಯಾಕೆ ? ದಿಂಬಿಗೆ ಮೊಗವಿಟ್ಟು

ಕತ್ತಲೆ ಕೋಣೆಯಲಿ ಬಿಕ್ಕಿ ಬಿಕ್ಕಿ 

ಒಬ್ಬನೇ ಅತ್ತ ಆ ಕ್ಷಣಗಳು..., ನಿನ್ನವಲ್ಲವೆ ?

ನಿಜ ಮೊಗವ ಮರೆಮಾಚಿ

ದಿನವೊ ಸುಳ್ಳು ಹೇಳಿ

ನಿನ್ನದಲ್ಲವೆನ್ನುವಂತೆ, ಸತ್ತು ಗಳಿಸದ

ಕೋಟಿಗಳಷ್ಟೇ..., ನಿನಗೆ ಮಾನ್ಯ!

ಯಾಕೆ ? ಎರಡು ಹೊತ್ತು ಉಟಕ್ಕೆ

ನಿನ್ನದೆನ್ನಿಸುವಂತೆ ಬೆವರು ಸುರಿಸಿ

ದುಡಿದ ಬಿಡಿಗಾಸು..., ನಿನ್ನದಲ್ಲವೆ ?

ನೀನು ಗೆದ್ದ ಸಾಮ್ರಾಜ್ಯಗಳಿಗೆ 

ಗಳಿಸಿದ ಹೊನ್ನು ಚಿನ್ನ ಹೆಣ್ಣುಗಳಿಗೆ

ಚಪ್ಪಾಳೆ ತಟ್ಟಿ ಉಲ್ಲಾಸದಿ ಕೂಗಿದ

ಹರ್ಷೋದ್ಗಾರಗಳಷ್ಟೇ..., ನಿನಗೆ ಚಿರ ಪರಿಚಿತ!

ಯಾಕೆ ? ನಿನ್ನ ಬೆನ್ನ ಹಿಂದೆ

ತೆಗಳಿ ಉಗುಳಿ ಹೀಯಾಳಿಸಿ

ನಿನ್ನ ಚಿತ್ರಕ್ಕೆ ಬಳಿದ ಮಸಿ..., ನಿನ್ನದಲ್ಲವೆ ?

ನೀನು, ನಿನ್ನರ್ಧವ ಒಪ್ಪದ ಮಾತ್ರಕೆ

ಅವು ಇನ್ಯಾರವೋ ಭಾವನೆಗಳಾಗಿಬಿಡುವುವೆ ?

ಮೂರ್ಖ,

ಅದರೊಟ್ಟಿಗೆ ಹೋರಾಟವ ಬಿಟ್ಟು,

ಕರೆದು, ಮುಟ್ಟಿ ಮಾತನಾಡಿಸು, ಸ್ವೀಕರಿಸಿ ಪ್ರೀತಿಸು

ಅರ್ಧ ಕಾಮನಬಿಲ್ಲೇ ಇಷ್ಟು ಸುಂದರ

ಕಾಣದ ಇನ್ನರ್ಧ ಅರಿತಾಗ

ಅದು ಇನ್ನೆಷ್ಟು ಸುಂದರ.

- ಬುರುಡೆ ದಾಸ